بيقلك تعرف الهايف منين ؟؟ ييجي في الهايفة ويتصدر

بسم الله الرحمن الرحيم

مثل مصري قديم سمعته من زمان اوي بيقول
تعرف الهايف منين ؟؟؟ قال لك ييجي في الهايفة ويتصدر

ما هو احنا كدة انا واسلام نسيب المشكلة الأساسية ونفضل نعمل خناقات علي المشاكل التافهة

يعني قعدنا نتكلم عن من الأحق بالبريمير
وهو داخل قرارة نفسه مقتنع ان مان يونايتد هو الأحق
ولكن احنا بنتضايق اوي لما الفريق يلعب ماتش وحش
لان احنا متعودناش منه علي الماتشات الوحشة

المهم
انا كنت متضايق جدا من اسلام
لحد ما حصلت حاجة غريبة جدا
انبارح الساعة 3 بالليل نازي اشتري سيريلاك لابن اخويا الصغير
ــ طبعا بيني وبينكوا انا اللي باكل نصه هههههههههههههه ـــ قابلت واحد صاحبي بيشجع الارسنال بجنون
بيقول لي فلتوا يا عم من بلاك بيرن
قلت له الحمد لله بس لعبنا ماتش وحش اوي
قال لي يا راجل حرام عليك
الشوط التاني كله حاطين الفريق في نص ملعبه
واخر ربع ساعة في ال 18 وهاتك يا ضرب
لدؤجة ان انا كنت مرعوب ان المان يتعادل او يفوز كمان
ده غير ان الحكم ظلمكوا جدا
طبعا اخدت نفس عميق كدة
من الأخر شميت نفسي بالبقين دول
وقلتله بتخاذل ايوة بسسسسسسسسسسسسسس مش المان اللي يفضل 87 عاجز عن فك الحصار
قال لي كله بقي من فريدل الله يعمر بيته
كان نفسي أدخل التليفزيون ابوسه واطلع تاني

المهم بعد الكلمتين دول رجعت فكرت كويس
ولقيت نفسي بقول تعرف الهايف منين ؟؟؟ ييجي في الهايفة ويتصدر

طبعا هتسألوني ايه دخل المثل ده بالموضوع

اقلكوا انبارح كنت راجع البيت الساعة 5 وكان عندي صداع نصفي موريني الويل وكان نفسي انام
المهم جيت انام لقيت نفسي الأول بفتح الشوتايم لقيت ماتش مان سيتي وبورتسموث

بتفرج علي الشوط الأول مقدرتش انام
ماتش كان تحفة معمارية
المان سيتي كان الطرف الافضل ولكن هذا لا يمنع وجود هجمات مرتدة رهيبة للبومباي
فريقين بيلعبوا كورة من أجل الكورة
عايزين يلعبوا فعلا
والدليل هذه الإحصائية الغريبة بين الشوطين
ان الشوط الأول انتهي بهدفين لهدف لصالح مان سيتي ولكن الاحصائية الأهم كان عدد الفاولات
احتسبت 3 فاولات فقط علي مان سيتي
وفاول واحد علي بورتسموث
تخيلوا هذا الخطأ الوحيد علي البومباي كان علي اللاعب هيريدارسون الذي منع فاسيل من الانفراد بالمرمي ونال اثرها كارت احمر

تخيلوا فاول واحد فقط محتسب ضد الفريق ومعه كارت احمر
غريبة جدا جدا

معني كدة ايه
ان الفريقين عايزين يلعبوا
مش بيفكرو الا في اللعب وبس
فمفيش وقت للضرب
ولا لمس الكرة باليد ولا الاعتراض عالتحكيم
المباراة كانت كرة صرف
اي كرة من اجل اللعبة وامتاع المشاهدين
مباراة بين فريقين في وسط الجدول
ولكن كانت كانها صراع عالبطولة

المهم نزل بورتسموث الشوط الثاني ضاغطا بشكل كبير مع انه ناقص احد لاعبيه
واضاع اهدافا في هذا الشوط أكثر من مان سيتي بمراحل
وانفرادات لولا تالق جوي هارت حارس المستقبل في العالم
الي ان احرز مان سيتي الهدف الثالث من كرة مرتدة جميلة جدا

اذا هو ده الدوري الإنجليزي الذي يمتعك ايما امتاع في اكثر من تسعين في المائة من مبارياته

المهم خلص الماتش والتحليل
بس الحمد لله الماتش كان فوقني والصداع راح تقريبا فطبعا نويت اني منمش بقي
قلت اما اقلب عالجزيرة
اول ما قلبت عالجزيرة لقيت هدف الريال
قلت ياه ايه المتعة دي لما اتفرج بقي يمكن يطلع ماتش كويس
فوجئت بالريال ينكمش
وراسينج يضغط
ولكن حتي هذا الضغط كان ضعيفا وكانت كل هجماتهم من كرات ثابته فقط سواء ركنيات او فاولات من عالأطراف
يعني مفيش ولا جملة كويسة اتلعبت
اه نسيت
وشفت كانافارو بيعمل مصايب
وال ايه احسن لاعب في العالم
ما علينا تيجي مع العمي ضباش
وشفت ضربتين جزاء لم يحتسبا لراسينج رغم انه مبيضغطش بشكل جديد
امال لو كان بيضغط
بجد بجد دفاعات الليجا عايزة لترين جاز وعود كبريت واديله

المهم بعد ما فقت من الصداع النصفي
بسبب ماتش الريال الصداع رجع تاني
ومدرتش بنفسي الا وانا صاحي الوقتي حالا من انبارح
ومشفتش الشوط التاني
ومعرفتش النتيجة الا الوقتي عن طريق النت

عرفتوا طبعا ليه انا قلت المثل ده
لان انا واسلام مسكنا مين الأحق بالدوري الإنجليزي وتركنا المشكلة الاساسية وهي من الأحق بالزعامة البريمير ليج ام الليجا
طبعا انا مش بقارن لان المقارنة فعلا محسومة
وبمراحل

المهم انا افتكرت الوقتي بعد كاس العالم انا واسلام عملنا الى مايتعمل وذلك بعد خروج الأرجنتين افضل من لعب من كاس العالم بالظلم التحكيمي
وخروج انجلترا ايضا بالظلم وكانت الطرف الافضل وهي ناقصة احد لاعبيها وليس اي لاعب
انما الجولدن بوي واين روني

وقلنا كاس عالم فاشل بسبب خروج فرقنا المفضلة

انما طبعا لا انا ولا هو نقدر نتكلم نص كلمة علي البريمير مهما حصل وسواء فريقنا المفضل فاز بالدوري ام لا
لانه سواء فزنا بالدوري ام لم نفز
فالمؤكد ان المتعة موجودة ومتعايشة مع تعايش البريمير ليج

المهم عنوان الموضوع من وجهة نظر اخري
بيقلك تعرف الهايف منين ؟؟؟قال لك ييجي في الهايفة ويتصدر

ههههههههههههههههههههه
وعلشان كدة الريال جه في الدوري الاسباني واتصدر
الحدق يفهم
ودمتم

مشكور يا برنس

مشكووووووووور دمك زى السكر يا تومه

مشكورين على المرور