بتروح سيتى ستارز ليه؟

بعد عمل الاحصائيات والابحاث اللازمه وصلنا لاكتشاف خطير اوي

الناس الي بتروح سيتي ستارز بتروح علشان سبب من دول

* تدخل السينما

* تاكل في الفوود كورت

* علشان تفضل تلف وتدور ومتشتريش حاجه وفي الاخر تروح

*علشان لو حد سألك كنت فين .. تقول " اصلي كنت في سيتي ستارز " ..

*عشان تبحلق في البنات الحلوه الي رايحه وجايه

* تدخل فيرجين ميجا ستورز وتمسك ولا 30 سي دي وتفضل تقلبهم ال يعني بتقرا الكلام الي عليهم وانت متعرفش يا عيني ولا مغني منهم اصلا

* تدخل سبينيز وتفضل ساعه تحط حاجات في العربيه وبعدين تلاقي الكاشيير زحمه اوي فتسيب العربيه مليانه قدام الكاشيير وتمشي وترجع تشتري من السوبر ماركت الي تحت بيتكو

* علشان تفضل طالع نازل علي السلالم المتحركه وفي الاسانسير الازاز

* علشان انت مزنوق وحمامات سيتي ستارز نضيفه

* علشان تقعد علي الموكيت الي قدام باب السينما

* علشان تضايق السيكيوريتي وبتوع الامن وتسند علي السور تتفرج علي الدور الارضي

* علشان ده أكبر موول في مصر

* علشان تطلب أكل وتفضل ساعتين تلف علي ترابيزه فاضيه لغايه ما الاكل يسقع ويبقي مالوش طعم

* علشان مش طايق تقعد في البيت

* علشان تجري من الأمن الساعه 2 الصبح لما ييجوا يقفلو الموول وانت مش عايز تروح

* عشان الدنيا بره حر موووت وجوه فيه تكييف

وانت بقى بتروح سيتى ستارز لييييييييييييه؟